BYDD y Ceidwadwyr Cymreig yn torri tir newydd yr wythnos hon, gan ddangos eu hymrwymiad i gynyddu'r defnydd o'r iaith Gymraeg.
Heddiw, bydd grŵp Cynulliad y blaid yn briffio'r cyfryngau yn y Gymraeg am y tro cyntaf erioed, a'r penwythnos hwn darperir gwasanaeth cyfieithu ar y pryd Cymraeg am y tro cyntaf yng nghynhadledd y blaid.
Dywedodd Paul Davies, Gweinidog Treftadaeth yr Wrthblaid ac AC Preseli Sir Benfro fod y ddau ddatblygiad hwn yn bwysig iawn i'r blaid.
Cynhelir cynhadledd y blaid y penwythnos hwn yn Venue Cymru, Llandudno, a bydd gwasanaeth cyfieithu ar y pryd i'r Saesneg ar gael i alluogi siaradwyr i ddefnyddio'r Gymraeg.
Mae disgwyl i nifer o siaradwyr Cymraeg annerch y gynhadledd. Mae dysgwyr Cymraeg, gan gynnwys Aelodau'r Cynulliad, hefyd yn cael eu hannog i ddefnyddio rhywfaint o Gymraeg yn eu hareithiau i'r gynhadledd.
Bydd y gynhadledd hefyd yn talu teyrnged arbennig i'r Arglwydd Roberts o Gonwy a fu'n flaenllaw yn y gwaith o sefydlu S4C, cyflwyno Deddf yr Iaith Gymraeg a chreu Bwrdd yr Iaith Gymraeg yn rhinwedd ei swydd fel gweinidog y Llywodraeth.
Ymddeolodd yr Arglwydd Roberts o'r meinciau blaen y llynedd ar ôl 37 mlynedd ar frig y byd gwleidyddol.
Meddai Paul Davies, Gweinidog Treftadaeth yr Wrthblaid ac AC Preseli Sir Benfro:
"Mae'r datblygiadau hyn yn bwysig iawn i'r Ceidwadwyr Cymreig ac yn pwysleisio ein hymrwymiad i'r iaith Gymraeg.
"Fel plaid rydyn ni'n awyddus i ddefnyddio mwy o'r Gymraeg yn ein holl weithgareddau. Mae darparu gwasanaeth cyfieithu yn ein cynhadledd a'n sesiynau briffio'r cyfryngau yn elfen bwysig o hynny.